【梨园逸事】口齿伶俐白雪仙

       每个粤剧花旦嘅成功，都有自己嘅特色同绝技：好似红线女就够好声，芳艳芬够温柔，白雪仙够口齿伶俐。

       白雪仙，原名陈淑良，广东顺德人，一九二六年农历四月喺广州出生。佢系粤剧老艺人白驹荣嘅长女，佢十二岁时，拜粤剧名伶薛觉先为师。佢同任剑辉被戏迷称为“任白”，缔造咗香港粤剧舞台上嘅传奇，演有《帝女花》、《紫钗记》等多部经典名剧。
 

       白雪仙活泼聪明，好学勤奋，佢觉得自己嘅口钳几好，口齿几伶俐，应该尽情发挥，成为自己嘅特点。戏行有句话叫“千斤白，四两唱。”即系话口白比唱仲紧要，讲口白用嘅气比唱仲多。讲口白要用嘴皮力，用感情，因为口白无音乐伴奏，所以节奏同韵味嘅掌握、同唱段和谐等，都反映出表演者嘅功力。
       白雪仙每出戏都着重喺口白上边花功夫，正所谓功夫不负有心人，好似喺名曲《剑合钗圆》里边，佢嘅口白就讲得好有特色好有感情：
 

       “君虞，若虞，妾为女子，薄命如斯，若是丈夫，负心若此，韶颜樨齿，饮恨而终，慈母在堂，不能供养，绮罗弦管，从此永休，征痛黄泉，皆君所致，李君李君，今当永诀矣！”
       仲有喺呢支曲嘅中段，边唱边接讲口白，转换得好快，白雪仙将口白嘅节奏掌握得恰到好处，既快而不乱，又快而清晰，呢个喺要练嘅。佢嘅呢段口白接唱，就处理得非常成功嘞：
 

       “（小玉口白）谁信你想你见我变卖头上紫钗，都已知我今非昔比，我想那卢家小姐，佢在你（接唱）乘龙日半绕盘龙髻插玉燕钗腰肢摆上画阁中，投怀向君弄髻描容，佢斜泛眼窝，微露笑涡，将君轻轻碰。指玉燕珠钗不惜千金买来耀下威风。（口白）你又可知新人髻上钗，会向旧人心上刺！”
 

       白雪仙除咗口白，仲经常叫编剧作啲节奏快字又多嘅唱段，嚟发挥自己嘅特点。好似呢段“花前遇侠”嘅唱段，亦都系因为显示出白雪仙口齿伶俐，颇有特色，而得到同行人嘅公认嘅。呢一个唱段节奏快、字密、高音、戏中人情绪激动，难度相当大：
 

      “（旦慛快唱）妾从无错处，叹我自招报应，怨句匹夫变性，更怕对慈母伴我病榻又向夜里，问我十郎那负心汉！”白雪仙唱得字字清晰，感情饱满且节奏流畅，到最后一句：“我我我掩耳闭目”佢处理成用沉重嘅气息声表达情绪激动。到“不听！”两字，她深吸一口气，拼尽全力加大音量，就好似心中嘅怨愤喷薄而出！